पुणे : श्री गणेशमूर्तींचे विसर्जन पर्यावरणपूरक पद्धतीने करण्यास नागरिकांना साह्य करण्यासाठी आघाडीची दूरसंचार कंपनी व्होडाफोन इंडियाने ‘व्होडाफोन इको-पाँड्स’ हा उपक्रम सुरू केला आहे.
यासाठी व्होडाफोनच्या महाराष्ट्र आणि गोवा परिमंडळाने पुणे महापालिका आणि राष्ट्रीय रासायनिक प्रयोगशाळा (एनसीएल) यांच्याशी भागीदारी केली आहे ; तसेच आठ व्होडाफोन स्टोअर्समध्ये व्होडाफोन इको-पाँड्स या तात्पुरत्या पाण्याच्या टाक्या उभारल्या आहेत. पुणेकरांना कोणत्याही एका व्होडाफोन स्टोअरमध्ये श्री गणेशमूर्तीचे विसर्जन करण्यासाठी जाता येईल. तेथे त्यांना विसर्जनासाठी साह्यही करण्यात येईल. एक प्रमोटर आणि एक लाइफ गार्डही येथे असेल.
जंगली महाराज रस्ता, हिराबाग, वाकडेवाडी, औंध, कर्वे रस्ता, एनआयबीएम रस्ता, कल्याणीनगर आणि खराडी येथील व्होडाफोन स्टोअर्समध्ये व्होडाफोन इको-पाँड्स तयार केली आहेत. याशिवाय भाविकांना ७३९१०००००० या क्रमांकावर संपर्क साधूनही व्होडाफोन इको-पाँड्सचा पत्ता जाणून घेता येईल. याव्यतिरिक्त एक मोबाइल विसर्जन व्हॅनही सेवेसाठी उपलब्ध करून देण्यात येणार आहे. काही निवडक गृहनिर्माण सोसायट्यांमध्ये आणि वृद्धाश्रमांत देखील या व्हॅनद्वारे विसर्जनासाठीची सुविधा उपलब्ध करून देण्यात येईल.
व्होडाफोन इको-पाँड्सचे उद्घाटन पुणे महापालिकेच्या घनकचरा व्यवस्थापन विभागाचे सहआयुक्त सुरेश जगताप आणि सीएसआयआर-एनसीएलच्या कॅटॅलिसिस विभागातील वरिष्ठ शास्त्रज्ञ डॉ. शुभांगी बी. उंबरकर यांच्या हस्ते आणि व्होडाफोनच्या महाराष्ट्र आणि गोवा परिमंडळाचे व्यवसाय प्रमुख आशिष चंद्रा यांच्या उपस्थितीत झाले.
‘गणेशोत्सव हा पुण्यात साजरा होणारा एक मोठा उत्सव आहे. यंदा १२५ वे वर्ष असल्याने तर तो अधिकच खास आहे. या उत्सवाचा आम्हीही एक भाग असल्याचे आम्ही मानतो. नागरिकांना श्री गणेशमूर्तींचे पर्यावरणपूरक विसर्जन करण्यासाठी व्होडाफोन इको-पाँड्सच्या माध्यमातून साह्य करण्यात येणार आहे. आपल्या जवळच्या व्होडाफोन इको-पाँडमध्ये श्री गणेशमूर्तींचे विसर्जन करावे आणि आपल्या लाडक्या गणपती बाप्पाला पर्यावरणपूरक निरोप द्यावा’, असे आवाहन आशिष चंद्रा यांनी केले.
डॉ. शुभांगी बी. उंबरकर म्हणाल्या, ‘एनसीएलने विकसित केलेल्या पर्यावरणपूरक गणेशमूर्ती विसर्जन प्रक्रियेचा प्रसार करण्यासाठी घेतलेल्या पुढाकाराबद्दल सर्वप्रथम मी एनसीएलच्या वतीने व्होडाफोनच्या टीमचे आभार मानते. मातीची गणेशमूर्ती तयार करा किंवा पीओपीची मूर्ती असेल, तर त्याचे विसर्जन करण्यासाठी सीएसआयआर-एनसीएलने विकसित केलेल्या पर्यावरणपूरक विसर्जन प्रक्रियेचा वापर करा’.
सुरेश जगताप म्हणाले, ‘एनसीएलने विकसित केलेल्या गणेशमूर्ती विसर्जन पद्धतीला पुणेकरांचा चांगला प्रतिसाद मिळतो आहे. नागरिक आता पर्यावरणाबाबत अधिक जागरूक असून, सकारात्मक परिणाम असलेल्या नव्या पद्धती ते आजमावून पाहत आहेत. हा नवा उपक्रम सुरू केल्याबद्दल मी व्होडाफोनची प्रशंसा करतो, तसेच पर्यावरणपूरक विसर्जन पद्धतीचा प्रसार करण्यासाठी मदत करत असल्याबद्दल आभारही मानतो.’
